سألتونا عن المصاري الكاش يلي عم تتوزّع باليونان

اللاجئين باليونان بيحسنوا يحصلوا على مساعدة مالية نقدية.
كيف؟ ولايمتى رح تستمر المساعدة المالية؟ واذا كنت عايش بسكن خاص، هل بحسن أحصل على هالمساعدة المالية يا ترى؟ وشو وضع يلي ساكن بمكان مهجور بشكل غير قانوني؟

شو هية المساعدة النقدية؟

شكل مختلف عن باقي البلدان الأوروبية، الحكومة في اليونان ما بتعطي مساعدات مالية للاجئين. بس بالرغم من هالشي، بعض المنظمات والوكالات غير الحكومية عم تعطي هلأ مصاري كاش (نقدي) للاجئين وذلك في كل مخيّم رسمي باليونان.

لايمتى رح تستمر هالمساعدة المالية؟

المنظمات رح تعطي مصاري للاجئين حتى نهاية عام 2017.

وببداية العام الجديد،رح يبلش برنامج إندماج خاص للاجئين باليونان. تفاصيل البرنامج مو متوفرة بالوقت الحالي، بس رح ننشر أي شي جديد بهالخصوص وقت بنحصل عليهم.

مين رح يحصل على هالمساعدة النقدية؟
  • إذا كنت لاجئ أو طالب لجوء وعايش بمخيم رسمي باليونان، بوقتها رح تحصل على المساعدة النقدية.

إذا متواجد بمخيّم رسمي، يمكن تكون المساعدة النقدية عم تتوزع حالياً. تواصل مع إدارة المخيّم أو إسأل حوليك عن الموضوع.

  • إذا كنت لاجئ أو طالب لجوء وساكن بشقة خاصة، كمان بيحقلك تحصل على هالمساعدة النقدية.

المصاري عم تتوزع حالياً للاجئين يلي ساكنين بشقق خاصة.

اذا كنت عايش بشقة خاصة وما استلمت مصاري إلى الآن، ابعتلنا رسالة خاصة على صفحتنا بالفيسبوك.

ورح نرسل ملفك للجهة المعنية.

راسلنا على صفحة دليل اللاجئ في الفيسبوك.

مين يلي مارح يحصل على المساعدة النقدية؟
  • إذا كنت عايش بمكان مهجور بشكل غير قانوني، بوقتها مارح يحقلك تحصل على المساعدة المالية.

  • إذا كنت أصغر من 18 سنة ومسافر لوحدك، بوقتها ما رح يحقلك تحصل على المساعدة النقدية.

  • إذا كان عندك دخل ثابت ومنتظم نتيجة عمل ما، كمان بوقتها مارح يحقلك تحصل على المساعدة النقدية.

ملاحظة: إذا حصلت على المساعدة النقدية من جهة ما، فوقتها مارح يحقلك تحصل على المساعدة النقدية من جهة تانية. المنظمات عم تفحص وتتأكد من انو الشخص ما يحصل على المساعدة النقدية مرتين. وأساساً محاولتك للحصول على المساعدة النقدية من أكتر من جهة رح يعرضك لمشاكل.

هل سأحتاج إلى هوية لأحصل على المساعدة النقدية؟

لتكون قادر إنو تحصل على المساعدة النقدية، بحاجة إلى هوية سارية المفعول وصادرة من السلطات اليونانية. هوية سارية المفعول تشمل:

  • مذكرة الشرطة
  • بطاقة التسجيل المسبق
  • بطاقة طالب الحماية الدولية
  • تصريح إقامة
  • إشعار تقييد الحركة (إذا كنت عايش بإحدى الجزر اليونانية وقدمت طلب للحصول على المساعدة النقدية هنيك)

ملاحظة: إذا صلاحية هويتك/مستنداتك كانت منتهية، فوقتها ما رح تكون المستندات مقبولة وما رح تحسن تحصل على المساعدة النقدية. إذا كانت صلاحيتهم على وشك الانتهاء فجدّدهم.

اشقد مقدار المساعدة النقدية يلي رح أحصل عليها؟ وكل اشقد لأحصل عليها؟

المنظمة رح تضيف مصاري على بطاقتك بشكل شهري.

مقدار المبلغ يلي رح تحصل عليه بشكل شهري بيعتمد على كبر أسرتك. وكمان بيعتمد على إذا كنت ساكن بمكان بيتقدّم فيه الطعام أو لأ.

إذا كنت ساكن بمكان بيتقدّم فيه الطعام، فوقتها رح تحصل على مبلغ بين 90 يورو للـ 330 يورو بالشهر اعتماداً على كبر أسرتك.

إذا كنت ساكن بمكان ما عم يتقدّم فيه الطعام، فوقتها رح تحصل على مبلغ شهري يتراوح بين 150 يورو للـ 550 يورو اعتماداً على كبر أسرتك.

أنا عم غيّر مكان إقامتي. كيف فيني أضل أحصل على المساعدة النقدية؟

إذا كنت عبتغيّر مكان تواجدك، فلازم تخبر المنظمة الحالية يلي عم تعطيك مصاري إنك بدك تترك المكان، وخبّر كمان يلي رح يزودك بالمصاري (المنظمة الجديدة) بالمكان يلي رح تنتقله. إذا ما كنت بتعرف أي منظمة رح تزودك بالمصاري بمكانك الجديد، فيك تتواصل معنا ونحن رح نساعدك بمعرفة الجهة المزوّدة.

راسلنا على صفحة دليل اللاجئ في الفيسبوك.

أنا خبروني إنّي لازم أنتقل من مخيّم لسكن خاص. هل هالشي يعني انو المساعدة النقدية يلي عبحصل عليها رح تتوقف؟

إذا كنت رح تنتقل من مخيّم رسمي لسكن خاص، فوقتها رح تستمر بالحصول على المساعدة النقدية. بس خود ببالك انو ممكن تحصل عليها من جهة مختلفة عن الجهة يلي كنت عبتحصل منها عالمساعدة.

ما رح تحصل على مصاري أقل من يلي كنت تستلمه بالمخيّم. بل ربما العكس، إذا كنت عبتنتقل من مخيّم كان ييتقدم فيه الطعام لسكن خاص ما بيتقدم فيه الطعام، فرح تحصل على مصاري أكتر من يلي كنت متعود تحصل عليهم بالمخيّم.

بس قبل ما تغادر مكانك، خبّر الجهة يلي عم تعطيك المصاري أو إدارة المخيّم بأنّك رح تنتقل.

وين بحسن بستعمل بطاقتي؟

بتحسن تستعمل بطاقتك بماكينات الـ ATM تبع سحب النقود (الصراف الآلي) وعند المحاسبة بالمحلات (يلي بيقبلوا البطاقة). بأثينا، كتير من اللاجئين بيستخدموا بطاقتهم بمحلات حول ساحة أمونيا.

شاهد كيف تستعملها من خلال هالفيديو بالأسفل:

رح ينفرض علي رسوم وقت بستخدم بطاقتي؟

يمكن. وقت بتستخدم الصراف الآلي لتسحب مصاري أو لتتأكد من حسابك، بوقتها رح ينفرض عليك رسوم. الرسوم حالياً عبتدفعها بعض المنظمات عنّك بس مو كل المنظمات.

لذلك من الأفضل انو تسأل الجهة المانحة بالتفاصيل حول هي النقطة.

اذا حاسبت بالسوبرماركت باستخدام بطاقتك (عوضاً عن الدفع كاش)، بوقتها ما رح تدفع أية رسوم إضافية.

في شي وقت محدد لازم علي أصرف المساعدة النقدية خلالها؟

لا يوجد عادة مهلة زمنية محددة لإستخدام النقود في البطاقة. ولكن في شهر أبريل، ستتغير طريقة حصول البرامج النقدية على التمويل. نوصيكم بسحب أي مبلغ مالي من بطاقاتكم قبل نهاية شهر آذار، 2017.

أنا كنت ساكن بالجزر وبعدين انتقلت للبر الرئيسي قبل ما يسمحلي. هل مازلت بحسن أن أحصل على المساعدة النقدية؟

لا. اذا انتقلت للبر الرئيسي بدون ما تاخد إذن، بوقتها الوثيقة الوحيدة يلي رح تمتلكها رح تكون إشعار تقييد الحركة. ما رح تحسن تحصل على المساعدة النقدية في البر الرئيسي وإنت معك إشعار تقييد الحركة من الجزر اليونانية.

بحسن شي أستعمل بطاقتي تبع المساعدة النقدية خارج اليونان؟

بطاقات المساعدة النقدية صالحة فقط داخل الأراضي اليونانية وهاد يعني إنو هنن مارح يشتغلوا خارج اليونان. إذا كنت رح تغادر اليونان عن طريق برنامج إعادة التوطين أو عبر لم شمل الأسرة، فلازم تسحب كل المصاري من بطاقتك قبل ما تغادر.

ابعتلنا أسئلتك على صفحة دليل اللاجئ في الفيسبوك.